Content from Ealli arkiiva

Vuorkásagain gullat dál Áles-Bireta muittašemiid. Álggus son muitala makkár lei poastadivššára bargu 1930-logus dassái go eváhkomátkái gárttai. Son govvida maid mátkki máttás, orruma Alavieskas ja ruoktot máhccama vuos Deanuleahkái Álesbáikái ja de badjelabbui Joganjálbmái.
Áles-Biret Valle, iežas sogas Hagelin lea riegádan 1900-logu álgojagiid ja dán ságastallama lea Jávrri-Johán Niillas bádden jagis 1993 go Áles-Biret lei 87-jahkásaš.

Dán Ealli arkiiva-prográmmas deaivat guokte sierra sohkabuolvva nissonolbmo. Álggos Ándde Jon Mákká, Magga Mattus Gámasmohkis. Son muitala iežas eallimis, biigomis, dološ fievrruin, mánnáriegádahttimis ja das mo son ii lihkostuvvan oažžut ealli mána. Go dát sáhka báddejuvvui ja sáddejuvvui vuosttas geardde miessemánus 1990, Mággá lei 84 jahkásaš. Doaimmaheaddji lea Inger-Mari Aikio.
Nuppi nissonolbmo, Marja Vuolab deaivat Báđožis Deatnogáttis. Báđoš lea su ruoktobáiki ja doppe son lea bargan juohke geasi turisttaiguin vaikke orru eará sajis. Turistabargu lea su miela miel bargu. Márjá muitala báikki ja guovllu birra ja maid iežas bargguid birra. Dát prográmma lea sáddejuvvon vuosttas gearddi jagis 1995. Doaimmaheaddji lea Inger-Mari Aikio.

Deanu bivdonjuolggadusaid birra leamašan ságastallan ja digáštallan várra nu guhká, go njuolggadusat leamašan. Miessemánu loahpa geahčen jagis 1990 go ságat, mat dál gullojit Ealli arkiivvas sáddejuvvojedje vuosttas gearddi ságastahtii turistabivddu gáržžideapmi Deanus ja Anárjogas. Oaivilat ledje bealis ja vuostá. Doammaheaddji Niilo Aikio hálešta Samuel Itäkiviin Anárjot siste, Jovnna Behtar Guttormiin ja su eamidiin Ándde Jon Risteniin Áhguoikkas, Veikko Porsangeriin Ohcejogas ja Johannes Haloneniin Njuorggámis. Buorre iđit Sápmi sáddaga, mas dát ságat gullojedje dalle, lei lágideamin Inger Mari Aikio. Dan maŋŋá njuiket jahkái 2008 ja geassemánu álgui. Dalle hálidedje gáržžidit báikkálaš olbmuid bivddu luossanáli seailuma dihtii. Doaimmaheaddji Niilo Aikio ságasta Veikko Guttormiin Bildámis.

Miessemánu loahppa ja luossabivdu gulle nannosit oktii jagis 1990, go dát ságat leat vuosttas geardde sáddejuvvon Sámi Radios. Luossabivddus deaivat Deanu alde Asko Länsman, Lasse Johansen, Saarel-Ovllá, Oula Aikio ja Biipoalbmá, Niiles Aikio ja luossabivddu geahččamin gáttis Kaija Länsman. Doaimmaheaddji lea Inger Mari Aikio. Dan maŋŋá mannát áiggis guhttanuppelot jagi ovddosguvlui ja gullat mo lei luossabivdu miessemánu loahpa geahčen jagis 2006. Nils Lukkari Veahčakis muitala. Doaimmaheaddji lea Jávrri Juhán Niillas, Niilo Aikio. Álggos luossaságat jagis 1990.

Dán Ealli arkiiva prográmmas Ándde Jon Risten, Kirsti Guttorm Áhguoikkas muitala makkár mállásiid lávejedje ovdalaš áiggiid borrat. Sii herskostalle ovdamearkka dihtii vuoiŋŋaš- ja jeagelgáhkuiguin ja jokŋalastadeajain ja goike geahppáiguin. Ándde Jon Risten muitala maiddái dološ dálkkodanvugiin. Dát sáttaoassi lea sáddejuvvon vuosttas gearddi Buorre iđit -sáddagis miessemánus 1989. Doaimmaheaddji lea Inger-Mari Aikio.